ഫസ്റ്റ് ലെഗോ ലീഗ് റോബോട്ടിക് ചാംപ്യൻഷിപ്പിൽ ഇന്ത്യൻ വിദ്യാർത്ഥികൾ ഉൾപ്പെട്ട ടീം യുണീക് വേൾഡ് റോബോട്ടിക്സിന്റെ സ്റ്റാർ ലിങ്ക് ടീം തുടർച്ചയായി രണ്ടാം തവണയും ദേശീയചാമ്പ്യന്മാരായി. ഈ വര്‍ഷം ഏപ്രിലില്‍ അമേരിക്കയിലെ ഹൂസ്റ്റണില്‍ 110ലധികം രാജ്യങ്ങള്‍ ഏറ്റുമുട്ടുന്ന ഫസ്റ്റ് (ഫോര്‍ ഇന്‍ഫര്‍മേഷന്‍ ആന്റ് റെകഗ്‌നിഷന്‍ ഓഫ് സയന്‍സ് ആന്റ് ടെക്‌നോളജി)ചാമ്പ്യന്‍ഷിപ്പില്‍ യുഎഇയെ ഔദ്യോഗികമായി പ്രതിനിധീകരിച്ച് യു.ഡബ്‌ള്യു.ആര്‍ സ്റ്റാര്‍ലിങ്ക് ആണ് പങ്കെടുക്കുക. രണ്ടു മലയാളികൾ അടക്കം ടീമിലെ മുഴുവൻ കുട്ടികളും ഇന്ത്യക്കാരാണ്. ദേശീയ തലത്തിൽ നടന്ന മത്സരത്തിൽ 200 ടീമുകളെ പിന്തള്ളിയാണ് സ്റ്റാർ ലിങ്ക് ജേതാക്കളായത്.
കഴിഞ്ഞ വര്‍ഷം ബ്രസീലില്‍ നടന്ന അന്താരാഷ്ട്ര മത്സരങ്ങളില്‍ യു.ഡബ്‌ള്യു.ആര്‍ സ്റ്റാര്‍ലിങ്ക് എഞ്ചിനീയറിംഗ് എക്‌സലന്‍സ് അവാര്‍ഡ് നേടി ലോകത്തിലെ ഏറ്റവും മികച്ച റോബോട്ടിക് ടീമുകളിലൊന്നായി സ്ഥാനമുറപ്പിച്ചിരുന്നു. മൂന്നു മേഖലകളിലായി 200ലധികം പങ്കാളിത്തടീമുകളില്‍ നിന്നും പ്രശസ്തമായ ചാമ്പ്യന്‍സ് അവാര്‍ഡ് ഉള്‍പ്പെടെ യു.ഡബ്‌ള്യു.ആര്‍ 7 പുരസ്‌കാരങ്ങള്‍ കരസ്ഥമാക്കി. നാസ, അമേരിക്കന്‍ പ്രതിരോധ വകുപ്പ്, ഗൂഗ്ള്‍, ആപ്പ്ള്‍, ബോയിംഗ്, ഫോര്‍ഡ്, ബിഎഇ സിസ്റ്റംസ്, വാള്‍ട്ട് ഡിസ്‌നി എഞ്ചിനീയറിംഗ്, റോക്ക്‌വെല്‍ ഓട്ടോമേഷന്‍ തുടങ്ങിയ ലോകോത്തര സ്ഥാപനങ്ങളാണ് ഈ രാജ്യാന്തര പ്രോഗ്രാം സ്‌പോണ്‍സര്‍ ചെയ്യുന്നത്. പ്രണവ് നക്കീരന്‍, നൈസ ഗൗര്‍, നമന്‍ ഛുഗാനി, മുഹമ്മദ് മിഫ്‌സല്‍ മഅ്‌റൂഫ്, അര്‍ണവ് ഭാര്‍ഗവ, അര്‍ജുന്‍ പ്രതീഷ്, വന്‍ശ് ഷാ എന്നിവരാണ് ടീം അംഗങ്ങൾ. മുഹമ്മദ് മുഖ്താര്‍, അഹിലന്‍ സുന്ദരരാജ്, അഹ്മദ് ഷമീം, അലി ശൈഖ് എന്നിവരാണ് ഇവര്‍ക്ക് പരിശീലനം നല്‍കിയത്.
‘സൂപര്‍ പവേഡ്’ എന്ന വിഷയത്തിലാണ് ഈ വർഷം മത്സരം നടക്കുന്നത്. ഫസ്റ്റ് ചാംപ്യൻഷിപ്പുകളിൽ പങ്കെടുക്കുന്നവർക്ക് 640 കോടി രൂപയുടെ സ്കോളർഷിപ്പാണ് സർവകലാശാലകൾ നൽകുന്നത്. അന്താരാഷ്ട്ര തലത്തില്‍ യുഎഇയെ പ്രതിനിധീകരിക്കാനാകുന്നതില്‍ സന്തോഷമുണ്ടെന്നും ഇന്നൊവേറ്റീവ് സൊല്യൂഷനുകള്‍ പ്രദര്‍ശിപ്പിക്കാനും ലോകമെമ്പാടുമുള്ള ടീമുകള്‍ക്കെതിരെ മത്സരിക്കാനും കാത്തിരിക്കുകയാണെന്നും യുണീക് വേള്‍ഡ് റോബോട്ടിക്‌സ് സിഇഒ ബന്‍സന്‍ തോമസ് ജോര്‍ജ് പറഞ്ഞു.